Öz qayğınıza qalın: Stresin və çəkinizin öhdəsindən gəlməyin səkkiz yolu

Stress insanlara minilliklər boyunca sağ qalmağa kömək edib. Lakin müasir həyat tərzi bizim stress səviyyəmizi uzun müddət elə yüksək səviyyədə saxlayır ki, o, bizim sağlamlığımıza mənfi təsir edə bilər. Bəzi insanlar üçün dadlı və enerjisi yüksək olan qida qəbulu  belə bir vəziyyətdən çıxış yoludur və bu, bədən çəkisinin və piylənmənin inkişaf riskinin artmasına səbəb ola bilər.

Bu hala tez-tez rast gəlinir. 2007-ci ilin “Stress in America” hesabatına görə amerikalıların 43 faizi stresli olduqda həddindən çox qida qəbul edir.

Stress problemi ondan ibarətdir ki, o, çox zaman gələcəkdə baş verə biləcək məqamlarla bağlıdır. Həyatımız gündəlik streslərlə zəngindir. Gələcəkdə baş verənlərə nəzarət edə bilməsək də, stresə qarşı reaksiyamıza nəzarət edə bilərik.

Yüngül stresin bəzi əlamətlərinə yuxu problemləri, narahatlıq və ya qarında qıcıqlanma - “kəpənək effekti” daxildir. Bunlar sizə tanış gəlirsə, burada sizə nəzarəti bərpa etməyə və sakit qalmağa kömək edə biləcək səkkiz istiqamət verilib.

Təhrikedici qüvvəni müəyyən etməyə çalışın. Sizi stresli hiss etməyə məcbur edən xüsusi vəziyyətlər və ya problemlər varmı? Bununla bağlı bir şey edə bilib-bilməyəcəyinizi düşünün. Əgər edə bilərsinizsə, plan tərtib etməyə çalışın. Məsələn, işiniz çox olduğundan stresli hiss edirsinizsə, iş yükünüzü müzakirə etmək üçün rəhbəriniz ilə görüş təyin edə bilərsiniz.

Yaxşı xəbər budur ki, biz stresə reaksiya vermək üçün yeni yollar öyrənə bilərik. Stresə necə reaksiya verəcəyimizi müəyyən etmək və sonra onunla yeni - daha sağlam mübarizə üsulunu öyrənmək vacibdir.

İdman özümüzü yaxşı hiss etməyə kömək edə və əhvalımızı yaxşılaşdıra bilər. Çalışın zövq aldığınız idman növü ilə məşğul olun.

Meditasiya bizə gələcəkdə baş verə biləcəklər barədə narahat olmaq əvəzinə, diqqətimizi hazırkı ana yönəltməyə kömək edir. Siz sakitləşmək üçün tənəffüs məşqi ilə başlaya və ya rahatladıcı musiqi dinləyə bilərsiniz. Bu məqsədlə "Headspace" kimi, xüsusi olaraq meditasiya üçün hazırlanmış mobil tətbiqlərindən istifadə edə bilərsiniz.

Stress zamanı yuxu pozula bilər. Amma hər gecə 7-9 saat yatmaq yetkin insanın sağlamlığı üçün vacibdir. Öz yuxu vərdişlərinizi yaxşılaşdırmaq üçün bir yol tapmağın mümkün olub-olmadığını yoxlayın. Əgər sizə kömək lazımdırsa, gecə yaxşı yatmaq barədə məsləhətlərimizi nəzərdən keçirin.

Sağlam qalmaq və yüngül qida qəbul etmək istəyimizə baxmayaraq, yemək stresin öhdəsindən gəlmə mexanizmi kimi görünür. Axı hamımız bilirik ki, dadlı yeməklər bizə özümüzü yaxşı hiss etməyə kömək edir. Ancaq bəzi insanlar üçün bu, asılılığa çevrilə bilər. Stresin nə vaxt yarandığını görməyə çalışın və ona necə reaksiya verdiyinizi anlayın. Sonra bunun əvəzinə həqiqətən zövq aldığınız bir şey etməklə sağlam reaksiya yaratmağa çalışın.

Dosta zəng etmək və ya sizə dəstək verən ailə üzvlərinin əhatəsində olmaq stresi azaltmağa kömək edə bilər. Lakin araşdırmalar onu da göstərib ki, digər insanlara sosial dəstək vermək də stresi yaxşı azalda bilər.

Bəzən streslə mübarizə asan olmur və yuxarıda təklif olunan istiqamətlər yalnız yüngül stress əlamətləri üçün faydalı ola bilər. Aqressivlik, unutqanlıq, səbəbsiz ağrılar, yuxu problemləri və daha az sosiallaşmağa meyllilik kimi simptomlar daha şiddətlidirsə, peşəkar kömək almaq vacibdir. Bu hallarda təlim keçmiş tibb işçisi sizə sağlam mübarizə mexanizmlərini tapmağa kömək edə bilər.